Buxheti miratohet mes tymit e kapsollave në 8 minuta/ Opozita: Juntë, nuk bëhemi palaço të Ramës! PS: S’u marrim me zor!

Në një prononcim për mediet  në përfundim të seancës plenare, deputeti Evin Salianji ka deklaruar nga oborri i Parlamentit se buxheti u miratua në mënyrë tinzare.

“E ka djegur kushtetutën e Republikës së Shqipërisë dhe po funksionojmë në kushtet e një junte ku forca fizike e garditësve po mbanë në këmbë këtë ngrehinë. E patë sot që në mënyrë tinëzare PS e votoi buxhetin që për herë të parë po godet shtresën e mesme. Për herë të parë do të taksohen në 23% profesioonet e lira; mjekët, ju gazetarët, stomatologët, mësuesit. Shtresa e mesme që po mban në këmbë këtë vend.

Unë nuk e kam dëgjuar, por kush thotë brroçkulla të tipit “po po të ishit ju çfarë do të ndodhëte?”, ju e patë që opozita propozoi amendime dhe u hodhën poshtë sepse nuk ka kontroll dhe balancë. Ne nuk mund të bëhemi palaço të Edi Ramës. Kush do të bëhet, të bëhet”- tha Salianji.

I pyetur për Komisionet Hetimore, deputeti i opozitës u përgjigj se “vetëm ky institucion ka mbetur pa u kapur. Është kapur opozita në të shkuarërn, vetëm ky institucion ka mbetur i pakapur. Komisionet Hetimore në parlament. Ka mbetur vetëm vullneti i njeriut. Ne do të vazhdojmë këtë betejë që është betejë për kushtetutë dhe qytetarët.”

Sipas Salianjit, beteja e deputetëve të opozitës “nuk është një betejë force por është një betejë për të drejtën. Kur ke të drejtën dhe argumentin, nuk ke pse të përleshesh.”

Po ashtu, një tjetër deputete demokrate ka reaguar ashpër pas hedhjes poshtë të amendamentit të saj për gratë që vuajnë nga kanceri i gjirit. Në një prononcim për mediet, Zheni Gjergji tha se kolegët e mazhorancës përdorën forcën e kartonave kundër 3 mijë grave që vuajnë nga sëmundja e rëndë e kancerit të gjirit.

“Mazhoranca miratoi buxhetin dhe u dha koncesioneve të shëndetësisë 50 milionë euro dhe hodhi poshtë amenadamentin tim në të cilin kërkova vetëm 6 milionë euro për 3 mijë gra që vuajnë nga kanceri i gjirit. Një paruke dhe një rikostruksion i gjirit kërkon vetëm 6 milionë euro. 3 mijë gra do të enden rrugëve. Është një kërkesë që sot u çua në mënyrë ligjore në parlament, por mazhoranca me 74 vota kundër e hodhi poshtë. Kjo është qeveria Rama. Mazhoranca miraton me forcën e kartonit fondet miliona euro për koncesionet. Mohimi i koncesioneve hetimore në shëndetësi, vazhdon të jetë mohimi i të drejtës së qytetarëve shqiptarë për të kërkuar llogari qeverisë Rama. Ndaj mos prisni asgjë. Do të vazhdojmë të jemi ende në varfëri të plotë”- tha kryetarja e komisionit të shëndetësisë, Zheni Gjergji.

Kreu i Grupit të Partisë Socialiste, Blendi Çuçi ka deklaruar se opozitës më tepër i intereson të bëjë zhurmë sesa të ofrojë zgjidhje. Për mediet në përfundim të seancës, Çuçi tha se buxheti për vitin 2024 “nuk është miratuar nga mazhoranca në 8 minuta, por pas një diskutimi shumë të gjatë.”

Insistimit të gazetarëve se e kanë bërë diskutimin me veten, Çuçi iu përgjigj duke thënë se diskutimi janë kryer në mbledhje të hapura të Komisioneve dhe diskutime me shoqërinë civile. Sa i përket opozitës, socialisti e pranoi se me sjelljen e saj ajo ka krijuar një anomali në mbarëvajtjen e jetës parlamentare, megjithatë shtoi se “Nuk i marrim dot me zor”.

“Nuk i marrim dot me zor. Mbledhjet kanë qenë të hapura, diskutimet në komisione me grupet e interesit. Buxheti nuk është miratuar pa diskutime sepse puna më e madhe bëhet në komisione dhe ju e dini shumë mirë. Aty debatohet, aty diskutohet, aty hidhen aleternativat dhe seancat plenare bëhen për t’u miratuar. Pa diskutim që ka një anomali të sjellë nga opozita”- tha Çuçi.

I pyetur rreth kërkesës së opozitës për Komisionet Hetimore, Çuçi tha se “Komisionet hetimore janë e drejtë legjitime e opozitës, nuk e kemi mohuar në asnjë rast. Komisionet hetimore që ka sjellë opozita nuk janë miratuar në asnjë rast për shkak të objektit. Nuk është detyra jonë të negociojmë për objektin, ai duhet të vijë sipas detyrimeve kushtetuese. Pse ata nuk e sjellin brenda detyrimeve kushtetuese?!”

Top Channel