Inter gjen akordin me Dumfries, ja kur do të vijë firma e rinovimit të kontratës për holandezin

Marrëveshja ekonomike tashmë është gjetur prej javësh, kontrata është gati, mungojnë vetëm firmat. Denzel Dumfries do të vazhdojë aventurën e tij me Interin, me një rinovim që do të zyrtarizohet ndoshta javën e ardhshme, ose më së shumti gjatë pushimit të Serie A (kur do të luhen kualifikueset e kombëtareve).

“Tuttosport” zbulon se holandezi do të rinovojë me rritje page nga 2.5 milionë euro aktuale në 4 milionë euro neto, plus bonuse, duke u përshtatur kështu me pagën e Federico Dimarco. Ai do të jetë i lidhur me klubin zikaltër deri më 30 qershor 2028. Asnjë klauzolë nuk do të përfshihet në kontratën e re, duke siguruar kështu që Dumfries të mbetet në Milano, pa rrezikun e një largimi me shumë zero. Në muajt e fundit, as Interi dhe as Dumfries nuk kanë marrë oferta të rëndësishme nga klube të tjera.

Megjithëse klubi zikaltër do të kishte konsideruar një transferim në verë, vlera e lartë e lojtarit i ka dekurajuar blerësit e mundshëm. Tani, Dumfries do të duhet të dëshmojë vlerën e tij në fushë, pasi ka shprehur dëshirën për të marrë më shumë minuta aktivizim.