“Ka ardhur në shtëpi i dehur” – Gruaja e Dani Alves konfirmon detaje interesante në gjyq

Dita e dytë e gjyqit të Dani Alves mbi akuzat për dhunim u zhvillua sot (e martë). Partnerja e Alves, Joana Sanz, ka dhënë dëshmi, duke treguar vendndodhjen e saj gjatë kohës kur dyshohet se ka ndodhur incidenti (30 dhjetor 2022).

Siç raporton mediumi katalan SPORT, Sanz e cila momentalisht jeton e ndarë nga ish-ylli i Barcelonës, ka zbuluar pjesë të bisedave që ajo kishte me Alves gjatë ditës kur dyshohet se ndodhi incidenti, dhe ajo gjithashtu tregoi gjendjen në të cilën ishte ai kur u rikthye në shtëpi në orët e para të mëngjesit.

“Në WhatsApp unë e pyeta atë nëse do të vinte për darkë dhe ai tha jo. Më vonë, nuk më kujtohet. Ai erdhi në shtëpi shumë i dehur, kundërmonte alkool. Ai u përplas me dollapin dhe ra në krevat. Në gjendjen në të cilën erdhi në shtëpi, unë mendova se do të ishte më mirë që ta lë kur ai të zgjohet”, ka thënë Sanz.

Marrëdhënia e Sanz me Alves ka qenë temë e shumë spekulimeve, që prej se braziliani u arrestua në janar të vitit të kaluar.

Raportimet shtojnë se një divorc mes palëve tashmë ishte në plan, ani pse Sanz e mohoi këtë gjatë dëshmisë së saj.

Alves vazhdon të qëndrojë i pafajshëm mbi akuzat që janë ngritur ndaj tij dhe nesër (e mërkurë), ai do të flasë në gjyq për të dhënë versionin e tij se si ka ndodhur ngjarja./Telegrafi/