Manchester United e gjen në Serie A zëvendësuesin ideal të Ten Hag – problem mbetet konkurrenca e madhe

Mediumi italian La Gazzetta dello Sport ka konfirmuar se Manchester United është i interesuar për shërbimet e trajnerit të Bolognës, Thiago Motta, ndonëse ish-reprezentuesi i Italisë nuk ka vendosur ende për të ardhmen e tij.

Problemi i vetëm në këtë situatë qëndron se “Djajtë e Kuq” nuk janë të vetëm në garë për shërbimet e tij, pasi që edhe Juventusi ka konfirmuar interesimin e tyre për ta emëruar Mottën në stol për sezonin e ardhshëm.

Kontrata e Mottës tek Bologna skadon në fund të sezonit, por klubi italian shpreson që 41-vjeçari do ta rinovojë kontratën në “Stadio Dall’Ara” përtej kësaj vere.

Bologna momentalisht gjendet në pozitën e katërt në Serie Am vetëm dy pikë mbrapa Juventusit në vendin e tretë, dhe ka një mundësi reale për kualifikim në Ligën e Kampionëve për herë të parë në histori të klubit.

Agjenti i Mottës, Dario Canovi, së fundmi ka thënë se Motta me siguri do të drejtojë një ekip që garon në Ligën e Kampionëve një ditë.

Bologna ka më shumë mundësi për të luajtur në garën më të madhe për klube në Evropë sesa Manchester United, të cilët janë tetë pikë mbrapa top katërshes në Ligën Premier.

Juventusi në anën tjetër gjendet në pozitën e tretë në elitën e futbollit italian, por ka fituar vetëm një ndeshje nga nëntë takimet e fundit në Serie A./Telegrafi/