Nuk e ka parë kurrë më nga viti 2006 – Materazzi flet për gjestin e shëmtuar që i kushtoi Zidanes me karton të kuq

Marco Materazzi ka zbuluar se nuk e ka parë më Zinedine Zidanen, pasi francezi e goditi me kokë gjatë finales së Kupës së Botës 2006.

Ikona franceze u përjashtua në ndeshjen e fundit të karrierës së tij duke debatuar me mbrojtësin italian dhe duke u përplasur me të me kokë, përpara se skuadra e Materazzi të vazhdonte të fitonte trofeun.

Materazzi, tani 50 vjeç, qëndron në formë dhe vazhdon të luajë herë pas here miqësore me ish-shokët e tij të Interit – por ai nuk dëshiron që karriera e tij profesionale të mbahet mend vetëm për atë moment në finalen e 2006-ës.

Materazzi i tha The Times: “Nuk më pëlqen, sepse nuk i përgjigjet asaj që ishte karriera ime. Ai episod nuk duhet të kishte ndodhur kurrë. Në tensionin e asaj finale në Berlin, mes grindjeve dhe ofendimeve, Zidane më ofroi fanellën e tij dhe unë thashë jo, se preferoja motrën e tij”.

“Më pas ai u kthye dhe reagoi siç e kujtojnë të gjithë. Nuk e pashë kurrë më Zinedinen”.

Dyshja natyrisht se nuk kanë raporte të mira, pasi një provokim i shëmtuar nga italiani, bëri që Zidane ta mbyllë karrierën në mënyrë më të hidhur të mundshme. /Telegrafi/