Përplasja e Bardhit dhe Nokës me Açkën te Komisioni i Mediave/ Aleanca e Grave Parlamentare: Dënojmë me ashpërsi aktet e dhunshme!

9 months ago 17

Aleanca e Grave Parlamentare ka reaguar pas ngjarjes së djeshme në Komisionin e Medias, ku shprehet se dënon me ashpërsi dhunën dhe intimidimin e ushtruar.

Përmes një reagimi publik, Aleanca e Grave Parlamentare shprehet se dënon dhunën ndaj deputetes Flutura Açka, ndërsa shtojnë se dhuna është akt që tregon dëshpërim.

Kujtojmë se dje u përplasën kreu i grupit të PD, Gazment Bardhi dhe deputeti i Partisë Demokratike, Flamur Noka me Flutura Açkën.

Reagimi i plotë:

Aleanca e Grave Parlamentare dënon me ashpërsi dhunën dhe intimidimin e ushtruar dje në Komisionin e Edukimit dhe Mjeteve të Informimit Publik ndaj Kryetares znj. Flutura Açka dhe kolegeve tona deputete anëtare në këtë komision! Dhuna është një akt që tregon dëshpërim. Përdoruesit e dhunës tregojnë hapur pamundësinë e tyre për të pranuar se ka mendim ndryshe, qëndrim ndryshe. Dhuna ndaj grave është të mos kuptosh më vetitë më të rëndësishme njerëzore dhe të futesh në një tunel errësire. Ne gratë deputete, shprehim indinjatë të thellë për atë që ndodhi dje si dhe për gjithë klimën e linçimit dhe përbaltjes së grave dhe kërkojmë vënien para përgjegjësive të autorëve të kësaj dhune. Ne besojmë te politika e arsyes, e mendjes dhe e argumenteve të qarta dhe refuzojmë errësirën e së paarsyeshmes, dhunën që vjen si pasojë e mungesës së argumenteve. Ne dënojmë aktet e dhunshme dhe shpresojmë që jo vetëm të mos përsëriten më, por Kuvendi të kthehet në shinat e normalitetit dhe të gjithë deputetët të bëjnë detyrën për të cilën qytetarët i kanë votuar. Ne i sigurojmë qytetarët shqiptarë e në veçanti gratë shqiptare se do vijojmë të jemi zëri i tyre në Parlamentin e Shqipërisë dhe do të refuzojmë e përballemi me çdo akt dhune dhe që frymëzon dhunë ndaj grave.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb

Read Entire Article