“Reshjet më të mëdha ndonjëherë” kanë lënë të vdekur 21 persona në Republikën Dominikane

Të paktën 21 persona, përfshirë edhe fëmijë, kanë vdekur gjatë fundjavës në Republikën Dominikane si pasojë e reshjeve të dendura.

Mediat raportojnë se stuhitë e rrëmbyeshme gjatë 48 orëve të fundit, kanë shkaktuar edhe përmbytje, duke dëmtuar infrastrukturën e vendit dhe duke lënë pa energji elektrike e ujë të pijshëm shumë zona.

“Ata që nuk besojnë në ndryshimet klimatike, tani fillojnë të besojnë”, tha presidenti dominikan Luis Abinader.

Ndryshe, qytetarët u paralajmëruan nga ambasada e Shteteve të Bashkuara, se reshjet pritet të vazhdojnë edhe në pjesë të tjera të vendit.

Si pasojë e motit të ligë, ka ndodhur edhe një incident vdekjeprurës, ku pas shembjes së një muri në kryeqytetin Santo Domingo, mbetën të vdekur 9 persona, përcjell Telegrafi.

Vdekjet e tjera kanë ndodhur nga përmbytjet.

Përveç dëmeve njerëzore e materiale, edhe mësimi në shkolla është ndërprerë.

Sipas Qendrës së Operacioneve Emergjente, deri më tash janë evakuuar 13,000 qytetarë. /Telegrafi/