10 months ago
15
Këshilltari amerikan për sigurinë kombëtare, Jake Sullivan, ka mbajtur një konferencë për shtyp në Izrael.
Ai përsëriti mbështetjen e Uashingtonit për të drejtën e Izraelit për t’u mbrojtur kundër Hamasit – të cilin ai e përshkruan si një “grup terrorist”.
Duke përsëritur mbështetjen e SHBA-së për një zgjidhje me dy shtete, ai tha se “populli izraelit ka nevojë dhe meriton të jetojë në paqe dhe siguri me fqinjët e tij në një rajon që është i integruar, dinamik dhe i qëndrueshëm”.
Megjithatë, ai tha se SHBA-ja dëshiron të shohë rezultate konkrete nga Izraeli në lidhje me shmangien e viktimave civile në Gaza, raporton skynews.
“Ajo që ne kemi thënë vazhdimisht është se Izraeli ka synimin të sigurohet që po i bën ato dallime [midis civilëve dhe objektivave ushtarakë] në mënyrë të qartë dhe të qëndrueshme dhe ne duam të shohim rezultatet të përputhen me këtë”, tha ai.
Sulmet ajrore dhe tokësore të Izraelit gjatë 10 javëve të fundit kanë vrarë më shumë se 18,700 palestinezë, sipas Ministrisë së Shëndetësisë të drejtuar nga Hamasi. Mijëra të tjerë janë të zhdukur dhe dyshohet se kanë vdekur nën rrënoja. /Telegrafi/
English (US) ·