Video/ Akrobati i cirkut dërgohet në spital pas rënies shokuese nga ‘Rrota e Vdekjes’ në Britani

Akrobati i paemëruar pësoi plagë të rënda pas rënies nga 6 metra lartësi nga rrota gjigante gjatë një numri të rrezikshëm cirku.

Në pamje shihen anëtarët e audiencës së cirkut Hippodrome në Yarmouth në verilindje të Britanisë, që lëshojnë klithma tmerri teksa performuesi bie nga struktura.

Një dëshmitar tha se akrobati u përplas me strukturën e metaltë dhe më pas u përplas përtokë.

Akrobati i ri që besohet se ishte në të 20-at ra gjatë performancës së pasdites në cirkun ‘Christmas Spectacular.’

Shfaqja raportohet se ndaloi menjëherë dhe u thirr policia e ambulanca.

Burri raportohet se ishte i ndërgjegjshëm kur u mor nga mjekët e ambulancës.

Një kolege akrobate tha se i lënduari ishte vëllai i saj, dhe e shoqëroi drejt spitalit.

Drejtori i cirkut tha për incidentin: “Ishte një gabim lëvizjeje. Ai kërceu për të kaluar një nga rrotat në lëvizje por rrëshkiti dhe ra përtokë.

Gjendja e të dëmtuarit raportohet e stabilizuar por mbetet në spital.

Top Channel