Zyrtare: Real Madridi konfirmon lëndimin e rëndë të Courtois – belgu u largua nga stërvitja në lot

Real Madridi përmes një komunikate zyrtare ka bërë me dije se pas testeve mjekësore është konstatuar se Thibaut Courtois ka pësuar një këputje të ligamentit në gjurin e tij të djathtë.

Ky lëndim i ri i Courtois ka ardhur sot (e martë) në seancën stërvitore që Real Madridi po e zhvillonte sipas planprogramit.

Sipas raportimit nga The Athletic, Courtois pritet që të jetë jashtë fushave për 6 deri në 7 muaj, që do të thotë se prezenca e tij këtë sezon është në rrezik serioz.

Tutje sipas mediave spanjolle, doktorët e Real Madridit janë duke vlerësuar nëse Courtois ka nevojë t’i nënshtrohet operimit apo jo.

Parte médico de Courtois.#RealMadrid

— Real Madrid C.F. (@realmadrid) March 19, 2024

Ky lëndim vjen në kohën më të keqe për belgun, pasi ai ishte fare pranë rikthimit në fushë pas këputjes së ligamentit në gjurin e majtë që bëri që ai të humbasë të gjitha ndeshjet deri në këtë fazë të sezonit.

Ka qenë vet Ancelotti ai i cili pas ndeshjes me Osasunën kishte konfirmuar se Thibaut Courtois me gjasë do të jetë i gatshëm për duelin ndaj Athletic Bilbaos pas pushimit me kombëtare, por tani lëndimi i ri e ka penguar këtë gjë.

Sido që të jetë, Real Madridi tani do të detyrohet të vazhdojë që t’ia besojë portën ukrainasit Andriy Lunin, i cili deri më tash ka bërë një punë të hatashme duke mos bërë që të vërehet mungesa e Courtois./Telegrafi/