9 months ago
9
Në prag të përballjes së shumëpritur për trofeun prestigjioz, kapiteni i Ballkanit, Armend Thaqi, ka dhënë një prononcim për Telegrafin rreth finales së Superkupës së Kosovës.
Ndeshja ndaj rivalëve kryesor të tyre, Prishtinës, vjen si një sfidë e rëndësishme për të dyja skuadrat, por sidomos për Ballkanin, që synon të thyejë një seri pa fitore në gjashtë duelet e fundit me ta, ku kanë pesë barazime dhe një humbje.
Thaqi ka besim të palëkundur dhe thotë se tani është koha që ta mposhtin Prishtinën dhe të marrin trofeun edhe pse ka respekt të madh për kundërshtarin.
“Është ndeshje finale dhe çdo finale është ndeshje e rëndë e sidomos kundër Prishtinës që është skuadër që di si të sillet në ndeshjet finale. Kemi të bëjmë me një ndeshje që sjell trofe dhe dëshirojmë që ta fillojmë vitin mbare, pra me trofe”.
“Kemi ecuri jo të mirë kohët e fundit me Prishtinën, mirëpo i takojnë së kaluarës dhe tani po fillojmë një vit tjetër. Shpresojmë që ta fillojmë me këmbë të mbarë”, ka thënë Thaqi për Telegrafin.
Në fund, mbrojtësi i njohur ka thënë se përgatitjet në Turqi po ecin shumë mirë dhe me ritëm të lartë.
“Përgatitjet po shkojnë në mënyrën fantastike me një ritëm të lartë e kjo na jep besim në paraqitje shumë të mirë nesër (e shtunë). Jemi në rrugë të mirë dhe shpresojmë që të ecë ndeshja nesër në favorin tonë”, ka thënë Thaqi.
Ndeshja Ballkani – Prishtina do të zhvillohet të shtunën nga ora 11:00. /Telegrafi/
English (US) ·