Përfaqësuesja më e dobët në botë shkroi histori në kualifikimet për Euro 2024

Përfaqësuesja e San Marinos e mbylli fazën kualifikuese për në Euro 2024 me dhjetë humbje në dhjetë ndeshje, por arriti një sukses historik.

Në tri ndeshjet e fundit kualifikuese, San Marino ka shënuar nga një gol, gjë që nuk ka arritur ta bëjë kurrë më parë. Pas humbjes 2-1 në shtëpi ndaj Danimarkës dhe humbjes 3-1 ndaj Kazakistanit, pasoi një ndeshje në shtëpi kundër Finlandës dhe në fund pati gëzim pavarësisht humbjes.

Finlanda po fitonte 2-0 deri në minutën e 97-të dhe më pas San Marino arriti në mënyrën më të ëmbël një sukses historik, ndeshjen e tretë radhazi me gol të shënuar. Në minutën e 97-të, Berardi realizoi nga një goditje dënimi, me të cilën nisi festën e madhe të asaj kombëtareje.

Mbizotëroi entuziazmi i përgjithshëm i lojtarëve në fushë, i përzgjedhësve me stafin e tyre profesional dhe i tifozëve. San Marino, përndryshe kombëtarja e 207-të dhe e fundit në renditjen e FIFA-s, u eliminua nga këto kualifikime me golaverazhë, tri gola të shënuara dhe 31 të pranuara.

San Marino ka luajtur 194 ndeshje në historinë e tyre dhe ka fituar vetëm një herë, në një miqësore kundër Lihtenshtajnit në 2004. /Telegrafi/