Thatësira ekstreme ndryshon ngjyrën e liqenit në Hawaii

Shkencëtarët thonë se për këtë nuancë “të çuditshme” mund të jetë fajtor thatësira dhe paralajmërojnë se banorët nuk duhet të hyjnë kurrë në ujë apo ta pinë atë.

Liqeni, dikur i pasur me peshq, tani i ngjan një skene nga një përrallë apo film vizatimor, ndërsa ndodhet në strehën kombëtare të kafshëve të egra të Pellgut Kealia.

Uji i liqenit në këtë ligatinë në ishullin Maui ka ngjyrë rozë të ndezur dhe ka qenë që të paktën nga 30 tetori, thonë zyrtarët, pasi përmbajtja e kripës së ujit është rritur për shkak të thatësirës ekstreme.

Mostrat e ujit të dërguara në Universitetin e Hawait sugjerojnë se halobakteret janë pas ngjyrës së re të ujit, sipas Agjencisë së Peshkut dhe Kafshëve të Egra të SHBA-së.

Halobakteret janë organizma njëqelizorë që lulëzojnë në ujë shumë të kripur, si Liqeni i Kripur i Madh dhe Deti i Vdekur. Ky bakter konsiderohet ekstremofil për shkak të aftësisë së tij për të jetuar në një mjedis kaq ekstrem, në këtë rast kripësia e ujit dy herë më e lartë se normalja.

Vetë rezervati mban emrin Kealia Pond, që përkthehet në “kripë e depozituar” dhe që tregon se është një terren i pasur me kripëra, por kripërat tani janë edhe më të përhapura për shkak të thatësirave ekstreme që kanë prekur ishullin Maui.

Rryma Waikapu, e cila sjell ujë nga malet West Maui në liqenin Kealia, gjithashtu rrjedh nëpër një zonë të prekur nga thatësira e madhe. Fluksi më i ulët i ujit të freskët rriti gjithashtu përqendrimin e kripës dhe siguroi një “strehë të rehatshme” për halobakteret dhe ngjyrën e ndritshme të ujit.

Rreth 90 për qind e qarkut Maui, i cili përfshin ishuj të tjerë të afërt, aktualisht është prekur nga një nga thatësirat më të këqija të regjistruara ndonjëherë në zonë.

Shkencëtarët po studiojnë se si kriza globale klimatike do të ndikojë në Hawaii, por ekziston një besim i përgjithshëm se thatësira do të përkeqësohet me rritjen e temperaturës globale, edhe në zonat tropikale.

Top Channel