U kthye në rrezik për pushuesit duke lundruar me Jet Ski në Sarandë, gjobitet rëndë drejtuesi. Pas kontrolleve, rezultoi se…

Policia Kufitare në Sarandë ka ndëshkuar me një gjobë të majme administrative 110 mijë lekë të reja një drejtues Jet Ski, pasi ka rrezikuar jetën e pushuesve, duke lundruar në det me mjet.

Përpos kësaj, Policia Kufitare ka vërejtur se drejtuesi i Jet Ski po lundronte pa dokumentacion përkatës, prandaj mjeti është sekuestruar.

“Sarandë

Shkeli perimetrin e sigurisë ujore, duke lundruar me mjet lundrues dhe u kthye në rrezik për pushuesit që frekuentonin plazhin e 📍Pulëbardhave, në Sarandë, ndëshkohet me masë administrative 110,000 lekë drejtuesi i mjetit lundrues Jet Ski.

Bllokohet menjëherë nga shërbimet e Policisë Kufitare dhe të Njësisë Policore Detare, mjeti lundrues Jet Ski, në bordin e të cilit mungonte edhe dokumentacioni përkatës.

Shërbimet e Policisë Kufitare Sarandë, në bashkëpunim me Njësinë Policore Detare, gjatë patrullimit të vijës bregdetare, me qëllim garantimin e rendit dhe sigurisë publike në zonat turistike, si dhe për kontrollin e përdorimit të mjeteve lundruese, kanë ndërhyrë menjëherë në plazhin e 📍Pulëbardhave, duke bërë bllokimin e një mjeti lundrues Jet Ski që kishte shkelur perimetrin e sigurisë ujore për plazhistët, duke vënë në rrezik jetën e tyre, si dhe lundronte pa dokumentacionin përkatës në bord.

Shërbimet e Policisë Kufitare e kanë ndëshkuar drejtuesin e mjetit lundrues, shtetasin R. Ç., me masë administrative 110,000  lekë, si dhe kanë bllokuar mjetin lundrues në Portin Sarandë.

Policia Kufitare apelon për të gjithë përdoruesit e mjeteve lundruese që të respektojnë me rigorozitet perimetrin e sigurisë ujore për plazhistët, të zbatojnë rregullat për përdorimin e mjeteve lundruese dhe të respektojnë zonat e përcaktuara për lundrim me këto mjete.

Gjithashtu, fton qytetarët që për çdo rast të shkeljes së perimetrit të sigurisë dhe të përdorimit të mjeteve lundruese në mënyrë të parregullt, të denoncojnë në numrin pa pagesë 112, duke iu garantuar reagim të shpejtë, në bazë të ligjit”, njofton policia.

(Balkanweb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb