Bajrami e bën “sefte” në Skoci, fantazisti kuqezi shënon golin e parë me Rangers në kampionat

Nedim Bajrami festoi jo ashtu sikurse do të dëshironte golin e tij të parë në kampionatin skocez.

Fantazisti i kombëtares shqiptare realizoi një gol të bukur për Rejnxhers, kundër Aberdin. Një gol tipik i Bajramit, i cili u fut nga e majta drejt qendrës, për të mposhtur me një goditje precize në pozicion të prirët, portierin vendas.

Ishte në fakt goli i barazimit të përkohshëm 1 me 1 që erdhi në minutën e 63, pas një kombinimi të suksesshëm të futbollistit shqiptar me shokun e skuadrës Lorens.

Megjithatë Bajrami nuk e shijoi plotësisht këtë gol, pasi Aberdin u rikthye në avantazh duke fituar sfidën me rezultatin 2 me 1. Që pasi u largua nga Sasuolo, Nedim Bajrami ka shënuar dy gola me Rejnxhers, përfshirë edhe atë në Europa League, pak javë më parë. /vizionplus.tv