Eksperti i Ballkanit në Institutin Leibniz për Studimet e Evropës Lindore dhe Juglindore në Regensburg, Konrad Clewing, ka komentuar alarmin e gjeneralit amerikan Wesley Clark dhe të kryeministrit të Kosovës Albin Kurti, se presidenti serb Aleksandar Vuçiq, dëshiron ta bëjë në Kosovë, atë që presidenti rus Vladimir Putin po bën në Ukrainë.
Historiani gjerman, nuk e përjashton mundëson që një gjë e tillë të ndodhë në planin aftamesëm ose në planin aftagjatë. Mirëpo, për momentin, sipas tij, Serbia nuk mund të sulmojë veriun, e aq më pak Kosovën në tërësi.
Për gazetën “Bota sot”, Clewing ka thënë se qëllimi i Serbisë me sulmin e 24 shtatorit vitin e kaluar, ishte që të pushtonte veriun e Kosovës, pa rezistencë ushtarake.
“Duke pasur parasysh dështimin e përpjekjes së shtatorit të kaluar për të nxitur një situatë ku Serbia mund të ishte në gjendje të pushtonte veriun e Kosovës pa u përballur me rezistencën ushtarake të KFOR-it (kjo është ajo që mendoj se incidenti në Banjskë ishte synuar nga Serbia), nuk mendoj se atje është një rrezik i menjëhershëm për t’u sulmuar plotësisht veriu nga Serbia, e aq më pak e gjithë Kosova. Por në një perspektivë afatmesme, situata ushtarake e veriut nuk është mjaftueshëm e qëndrueshme për të parandaluar që gjëra të tilla të përsëriten. Dhe në planin afatgjatë, meqë Serbia vazhdon të ndjekë synimet revizioniste për Kosovën në tërësi, as e gjithë shoqëria në Kosovë nuk është e sigurt nga ai lloj rreziku”, ka deklaruar ai.
Për të parandaluar edhe kërcënimin më të vogël, ekpserti ka përmendur tri masa, që sipas tij, duhet të ndërmerren nga autoritetet e Kosovës. Si masë të parë, ai kërkon riforcimin e lidhjes së Kosovës me aleatët e saj dhe NATO-n.
“Janë tri masa të ndryshme që duhen marrë për të parandaluar si kërcënimin e vogël, ashtu edhe atë më të madh.
Masa e parë është të riforcohet koordinimi dhe lidhjet e Kosovës me aleatët e saj kryesorë dhe NATO-n në tërësi, dhe t'i lejojmë ata partnerë të kuptojnë se cilat janë rreziqet ushtarake realisht në rrezik për të ardhmen e parashikueshme (në të cilën për fat të keq Serbia mund të pritet të ruajë armiqësinë e saj ndaj ekzistencës së Kosovës), dhe çfarë nënkuptojnë ato kërcënime për (jo)stabilitetin e Ballkanit dhe për interesat më të mëdha jo vetëm të Kosovës, por edhe të Perëndimit”, ka nënvizuar Konrad Clewing.
Si masë të dytë, eksperti përmend përmirësimin e kapaciteteve dhe aktiviteteve diplomatike të Kosovës.
“Së dyti, Kosova duhet të përmirësojë kapacitetet dhe aktivitetet e saj diplomatike në mënyrë që të kapërcejë pengesën themelore të mosnjohjes nga katër shtetet anëtare të NATO-s kundër perspektivës së anëtarësimit të Kosovës në NATO. Edhe nëse nuk mund të arrihet njohja nga ato shtete, mosnjohësve nuk duhet t'u jepet pozicioni për të vënë veton ndaj perspektivës së anëtarësimit në NATO (ose për të lejuar që të tjerët të merren si justifikim për të mos ofruar këtë perspektivë për Kosovën). Deri më tani, qeveria e Kosovës nuk ka arritur të përdorë në mënyrë efektive vrullin e dhënë nga sulmi i Rusisë ndaj Ukrainës për t'i lënë partnerët perëndimorë të kuptojnë se pozicioni ndërkombëtar i Kosovës ka nevojë për përmirësim urgjent”, ka thënë historiani.
Për të frenuar ushtarakisht Serbisë, sipas tij, Kosova duhet të aplikojë më seriozisht për anëtarësim në NATO.
“Së treti, për t'u kthyer në një aplikant më serioz për anëtarësim në NATO, dhe për të kontribuar thellësisht në frenimin e Serbisë nga çdo veprim ushtarak. Kjo është një domosdoshmëri që të përmirësohen më tej kapacitetet ushtarake të vetë Kosovës. Masat në këtë drejtim janë marrë, por ato duhet të jenë një angazhim i qëndrueshëm dhe strategjik i qeverisë dhe shoqërisë (dmth. taksapaguesve)”, ka shtuar Konrad Clewing për “Bota sot”.
Gjenerali Clark, në një intervistë të përbashkët me kryeministrin Albin Kurti për CNN, ka thënë se “Serbia dhe Rusia po e imitojnë njëra-tjetrën”.
“Dora e Rusisë ndihet në Ballkan, Serbia është dora e Rusisë në Ballkan dhe i shërben interesave të Rusisë. Vuçiq është i mençur, dëshiron të duket sikur po luan në dy anët, por kur të vjen koha ai do të bëjë atë që do Putini që ai të bëjë.
Kemi parë shumë dhunë, vrasje në 30 vjetët e fundit dhe kemi menduar se NATO-ja e ka ndaluar, por nëse ka probleme në Ukrainë ai problem do të vijë në Ballkan dhe liderë, si kryeministri Kurti, duhet të përballen me të”, ka thënë ndër tjerash Clark./Botasot