Izraeli zotohet të vazhdojë operacionin ushtarak “të vështirë” në Gaza: Nuk kemi zgjidhje tjetër

Ushtria izraelite është zotuar të vazhdojë operacionin e saj në Gaza, por pranoi se është “i zgjatur” dhe “i vështirë”.

Një zëdhënës tha gjatë fundjavës se po zgjeronte “operacionet e saj tokësore në Rripin jugor dhe verior të Gazës”.

Ndërkohë, SHBA-ja tha se Joe Biden foli me kryeministrin izraelit dhe theksoi “nevojen kritike” për të mbrojtur civilët.

Në përgjigje, Benjamin Netanyahu tha se lufta do të vazhdojë derisa të arrihen të gjitha qëllimet izraelite.

Presidenti Biden u tha gjithashtu gazetarëve se ai nuk i kishte kërkuar Netanyahut armëpushim.

Të premten, Këshilli i Sigurimit i OKB-së miratoi një rezolutë që kërkon dërgimin e ndihmave në shkallë të gjerë në Gaza, por nuk bëri thirrje për një armëpushim midis dy palëve ndërluftuese.

Bisedimet e zhvilluara në Egjipt në fillim të kësaj jave, të dizajnuara për të siguruar një armëpushim të ri midis Izraelit dhe Hamasit, deri më tani nuk kanë dhënë rezultate.

Një zyrtar palestinez i njohur me negociatat e armëpushimit i tha BBC-së se Egjipti prezantoi një plan të ri me tre faza që fillon me një armëpushim humanitar dy-javor i cili mund të zgjatet, gjatë të cilit Hamasi liron 40 pengje dhe Izraeli liron 120 të burgosur palestinezë.

Kjo fazë do të pasohej nga formimi i një organi të pavarur që do të merret me ndihmën humanitare dhe rindërtimin, si dhe një armëpushim gjithëpërfshirës dhe shkëmbim të të burgosurve.

Ministria e Shëndetësisë e drejtuar nga Hamasi thotë se më shumë se 20,000 njerëz janë vrarë dhe 54,000 janë plagosur në Gaza që nga fillimi i luftës. Shumica e të vdekurve janë gra dhe fëmijë, thotë Hamasi.

Izraeli thotë se ndërmerr hapa për të shmangur viktimat civile dhe fajëson Hamasin për përfshirjen e tij në zona me popullsi të dendur.

Ndërkohë, IDF ka njoftuar se 14 ushtarë të saj janë vrarë në luftimet në Gaza që nga e premtja, duke e çuar totalin në më shumë se 150.

Duke iu përgjigjur vdekjeve, Netanyahu tha të dielën se lufta po kërkonte një “çmim shumë të rëndë” për Izraelin, por se nuk kishte “zgjidhje tjetër veçse të vazhdonte të luftonte”.

Izraeli thotë se 700 militantë palestinezë janë arrestuar që kur filloi operacionin e tij ushtarak dhe pushtimin e Gazës me qëllim të eliminimit të Hamasit.

Operacioni izraelit filloi pasi luftëtarët e Hamasit kaluan nga Gaza në Izraelin jugor më 7 tetor, duke vrarë 1200 njerëz dhe duke marrë rreth 240 pengje.