Përleshje të ashpra në Amsterdam, tifozët izraelitë sulmohen nga holandezët, reagojnë të dyja vendet: E papranueshme!

Tifozët izraelitë të Maccabi Tel Aviv u sulmuan rëndë në Amsterdam gjatë mbrëmjes të së enjtes, thanë autoritetet, ndërsa qeveria izraelite tha se po dërgonte aeroplanë për të evakuuar qytetarët e prekur. “Qindra tifozë të skuadrës së futbollit izraelit Maccabi Tel Aviv u zunë pritë dhe u sulmuan në Amsterdam të enjten mbrëma teksa largoheshin nga stadiumi pas ndeshjes së Europa League kundër skuadrës holandeze Ajax”, shkruante ambasada izraelite në Shtetet e Bashkuara në platformën X. Videoja e publikuar në mediat sociale e shpërndarë nga ambasada tregoi atë që ajo tha se ishte dhunë ndaj tifozëve të Maccabi.

Kryeministri holandez Dick Schoof tha në X se ai ishte në kontakt me kryeministrin izraelit Benjamin Netanyahu dhe ishte i tmerruar nga sulmet antisemitike ndaj qytetarëve izraelitë.

“Kjo është krejtësisht e papranueshme. Unë jam në kontakt të ngushtë me të gjitha palët e përfshira dhe sapo fola me (kryeministrin izraelit) Netanyahu në telefon për të theksuar se autorët do të identifikohen dhe ndiqen penalisht”, tha ai, duke shtuar se situata në Amsterdam tani është e qetë.

Netanyahu theksoi në një telefonatë me Schoof rëndësinë supreme të qeverisë holandeze për të garantuar sigurinë e të gjithë izraelitëve në Holandë, tha Zyra e Kryeministrit izraelit. “Netanyahu deklaron se e sheh si të rëndë sulmin e planifikuar antisemitik kundër qytetarëve izraelitë”, shkruante Zyra e Kryeministrit, duke shtuar se ai kërkoi rritjen e sigurisë për komunitetin hebre në Holandë.

Tensionet politike ishin rritur përpara ndeshjes e së enjtes mbrëma me video të shumta të pakonfirmuara në mediat sociale që tregonin tifozët e Maccabi duke brohoritur për konfliktin në Lindjen e Mesme, teksa gjithashtu u postuan dhe pamje kur hiqnin flamurët palestinezë nga dritaret e ndërtesave në Amsterdam. Policia lokale tha se 57 persona ishin mbajtur pas ndeshjes teksa demonstruesit pro-palestinezë ishin përpjekur të arrinin në stadiumin “Johan Cruyff”, edhe pse qyteti i kishte ndaluar të protestonin atje, raportoi Reuters. Policia tha se tifozët ishin larguar nga stadiumi pa incidente, por gjatë natës u raportuan përleshje të ndryshme në qendër të qytetit.